admin10
د. محمد الطربيلي
المصري البسيط دلوقتي بقى متخصص في علم الاقتصاد من غير ما يدخل كلية تجارة، مش لأنه قرأ كتب كينز أو آدم سميث، لكن لأنه عايش التجربة يوم بيوم. الأسعار بتزيد بسرعة الرصاصة، والمرتب واقف مكانه زي تمثال فرعوني. المواطن يمد إيده على جيبه يلاقيه فاضي، يشد الحزام أكتر، لحد ما الحزام نفسه بقى محتاج حزام.
الحكومة من ناحيتها ما بتتأخرش، تطلع تصريحات يومية كلها طمأنة، كلام عن خطط بعيدة المدى، رؤى مستقبلية، أرقام مش فاهمها غير اللي كاتبها. المواطن يسمع ويهز راسه، وبعدين ينزل السوق يلاقي كيلو الطماطم سعره محتاج موافقة تمويلية.
المفارقة إن المواطن طول الوقت مطلوب منه يصبر ويتحمل ويشارك في عبور المرحلة، لكن مفيش حد بيشاركه في طابور العيش ولا في فاتورة الكهربا. المواطن بقى يعرف إن التضخم مش مجرد مصطلح اقتصادي، التضخم بالنسبة له هو إن المرتب يخلص قبل نص الشهر، وإن الولاد يسألوه “هنشتري لبس العيد إمتى” فيرد: “استنوا المنحة اللي جاية”.
الحكومة شايفة الأزمة مجرد أرقام ورسوم بيانية، أما المواطن فشايفها في الفواتير والدواء والمواصلات. هو يشد الحزام لدرجة إن النفس اتقطع، وهي تشد الكلام لدرجة إن المواطن بقى حافظ الجمل زي: “الوضع تحت السيطرة” و”الأزمة عالمية” و”القادم أفضل”.
في النهاية، المواطن المصري دايمًا عنده قدرة على التحمل يمكن العالم كله يحسده عليها، بس السؤال: لحد فين؟ وهل ممكن ييجي يوم يلاقي المواطن نفسه خلاص مش لاقي حزام يشده؟
altabaea1
