الجندي المجهول

ملائكة الرحمة مليون سلام وتحيه

 

 

 

كتب/ محمد عمر الزعتري 

 

هي دي حياه التمريض

 التمريض مهنه الرحمة جربت تسهر جنب عيان فالعنايه المركزه مش من أهلك و تغيرله حفاظه و تمسحله افرازاته و إخراجه و عينك متتشالش من عليه خوفا من تدهور حالته فجأه ؟

جربت تيجي شغلك فتلاقي طفل رضيع في حالة صحية سيئه جوه حضانه و مش عارفين يوصلو لأهله فتلم انت و زمايلك من بعضكم عشان تجيبوله لبن و بامبرز ؟

جربت تقعد ليل و نهار مع مريض حروق و تسمع صرخاته طول الوقت و هو بيتألم و انت قاعد جنبه بتغيرله على جروحه و تديله علاجه ؟

جربت تبقى معرض لجميع أنواع العدوى المعروفه و الغير معروفه ؟

جربت تقعد كل يوم وسط مرضى الغسيل الكلوي و تسمع حكاويهم اللي تبكي الحجر و هما بيعتبروك حد من أهلهم ؟

جربت طيب تسيب ابنك او بنتك عيان في البيت و تنزل شغلك عشان تداوي مرضى تانيين مش من أهلك ؟

بلاش ده كله ..

 

جربت تفطر في رمضان على شفطة عصير و انت متعقم و بتساعد فالعمليات ؟

جربت تسيب أهلك طيب ليلة عيد و الناس كلها سهرانه بتحتفل و انت قاعد تسمع شكاوى الناس و تخفف من آلامهم ؟

 

هيا دي حياة التمريض

و هو ده اللي مش هيفهمه أو هيحسه غير التمريض

و هيا دي عيشتهم اللي هيفضلو عايشينها 

 الله العظيم

عمرنا ما هنلاقي في الدنيا كلها زي التمريض المصري

و مهما نتكلم أو نشرح ما هنوفيهم حقهم عليا أنا قبل أي حد تاني

ربنا يجعله في ميزان حسناتكم تمريضنا الغاليين علينا