رسالة أرابيسك للشباب 

 

 

كتب: محمد بهيج

 

 

-فى سنة 1994 قدم التليفزيون المصرى مسلسل (ارابيسك) وهو من أروع المسلسلات حتى يومنا هذا وكان من إنتاج قطاع الإنتاج بالتلفزيون المصرى

 

 

-المسلسل كان من تأليف كاتب الروائع الرائع المحترم جدا استاذ اسامه أنور عكاشه وإخراج الاستاذ جمال عبد الحميد وكان بطولة الاساتذه صلاح السعدنى وكرم مطاوع وابوبكر عزت وهدى سلطان وسهير المرشدى و جيهان فاضل وكوكبه كبيره من الفنانين المحترمين 

 

 

-فى هذا المسلسل كان فيه ولد صغير كان عامل دور صبى لحسن ارابيسك اسمه عمرو محمد على كان يقوم بدور ثانوى فى المسلسل وكان اسمه فى المسلسل شوقى وكان بيدلعوه ب (شقشق )

 

 

-كان حسن ارابيسك اللى كان قايم بدوره فى المسلسل الاستاذ القدير صلاح السعدنى رحمه الله بيشفق على شقشق وبيعلمه صنعة الارابيسك فى خان الخليلى عشان والده كان كفيف وعشان يصرف على ابوه الكفيف واخته الصغيره رغم ان حسن ارابيسك كان فى بداية المسلسل شقى ولكن دى تيمة الاستاذ (اسامه) يعلى بالشر فى البدايه وينهى بانتصار الخير والقيم والمبادئ 

 

-فوالد شقشق (الكفيف) فى مره اشتكى لحسن ارابيسك أن شوقى (شقشق) مش بيديه كل الفلوس اللى بياخدها من معلمه حسن ارابيسك وخايف أنه يكون بيصرفها فى حاجه غلط 

 

-فحسن ارابيسك مسك شقشق ضربه علقة موت عشان يعرف بيودى فلوسه فين فاعترفله شقشق أنه بيحوش عشان يجيب شنطه لاخته الصغيره لما تدخل المدرسه 

 

-المهم فى أحداث المسلسل حصل حادث ارهابى فى الحاره بتاعتهم فمات فيها شقشق والحاره كلها اتعاطفت مع شقشق وابوه الكفيف فضل يبكى و ينادي عليه حتى المشاهد تقمص الدور وحزن وبكى على شقشق وابوه لانه هو العائل الوحيد لابوه واخته 

 

-كل مسلسلات اسامه أنور عكاشه كانت هادفه جدا فى كل بدايات مسلسلاته يلقى الضؤ على الظلم والفساد ولكن ينهى المسلسل بانتصار الحق والعدل والقيم والمبادئ فمثلا فى مسلسل الشهد والدموع وكان إخراج رفيق دربه الاستاذ اسماعيل عبد الحافظ فى آخر 

 

المسلسل انتصرت زينب بنت جعفر (عفاف شعيب) على حافظ رضوان (يوسف شعبان) اخو جوزها شوقى (محمود الجندى) اللى حافظ ظلمه وموته بحسرته وظلم ولاده ومراته من بعده وكذلك فى المال والبنون انتصر الحلال على الحرام وبأقل التكاليف الانتاجيه 

 

-إنما الان الا ما رحم ربى كل المسلسلات ضرب وبلطجه ومخدرات وتكاليف إنتاج رهيبه 

 

-فتجد واحد زى الاستاذ سامح حسين ملهوش أى مكان فى أعمال رمضان بالكامل 

 

-فقدم برنامج هادف جدا على اليوتيوب بتكلفه إنتاجية لا تذكر باسم (قطايف ) بيقدم قيم ساميه للمجتمع وإصلاح سلوكيات خاطئه وسبحان الله وبقدرة قادر البرنامج يسمع ويلقى صدى أكثر من مسلسلات العرى والمخدرات اللى كلفت أرقام رهيبه

 

ونال على اثره الفنان سامح حسين تكريم من الهيئه الوطنيه للإعلام برئاسة الاعلامى المحترم استاذ احمد المسلماني ونائبه الاعلامى الخلوق استاذ اسامه كمال وتكريم شخصى من وزير الاوقاف الدكتور اسامه الازهرى لما يقدمه البرنامج من توعيه وإصلاح سلوكيات مجتمعيه 

 

-واخيرا فى إفطار القوات المسلحه بحضور إعلاميين وفنانين منذ ساعات داعبه الرئيس السيسى بسؤاله(فين القطايف يا حسين)

 

-اعتقد ان سامح حسين كتب اسمه بحروف من نور بعد أن نبذه ولفظه المنتجين والمخرجين ولم يشروه حتى بثمن بخس وزهدوا فيه وسيلهثوا خلفه ويتعاقدوا معه بأعلى الأجور وان غدا لناظره قريب وندعو الله أن يعيذه من شر الأشرار ويديم عليه بر والدته ومحبة الطيبين ويكثر من امثاله

 

-فلابد لنا من تشجيع هذه النوعيه من المحترمين واعمالهم انتصارا لله فيهم حتى نشجع الشباب على السلوكيات الصحيحه والقيم والمبادئ السويه 

 

-طبتم وطاب صباحكم بكل خير 

 

-وكل عام والمسلمين بخير وصحه وسعاده